قصه و قصيده

سقراط · 02-21-2008

قصه و قصيده

الشاعر جحيش بن مهاوش قال قصيدته المرثية في عياله حيث دعا عليهم واستجاب الله دعوته ولم ينجبوا أولادا

وقيل أنهم تزوجوا مرة ومرتين وثلاث من أجل أن يرزقهم الله ولكن أمر الله قد نفذ وانقطعت من ذلك الزمان ديارهم .......

(ولم ينجبوا أولادا) . والقصة وما فيها أنهم تنكروا لوالدهم حيث توفيت أمهم وهم صغار وقام بتربيتهم حتى كبروا

وكان لهم بمثابة الأم والأب يسهر الليالي على رعايتهم وراحتهم وفي النهار يذهب لجلب طعامهم............. الخ

وعندما كبروا تنكروا له وأصبح لا يريده أحد منهم مراعاة لخاطر زوجاتهم اللاتي تأففن من خدمته

وصار كل واحد منهم يطرده من بيته فما كان من الوالد إلا أن سكن إحدى (الخربات)

حتى صار لا يقوى على النهوض أو السير وضعف بصره فذهب زاحفا يتوسل

ويرتجي أبناءة بأن يمكث عندهم حتى يقضي الله أمرة فلم يستجب له أحد منهم ......................

فقال فيهم الأبيات التالية :

قال الذي يقرا بليا مكاتيب 0000 ياللي تقرون العمى من عماكم

ياعيالي اللي تشرفون المراقيب 0000 تريضوا لي واقصروا في خطاكم

خذوا كلام الصدق ما به تكاذيب 0000 مثل السند مضمون للي وراكم

ياعيال لا صرتوا ضيوف ومعازيب 0000 ترى الكلام الزين ملحة قراكم

وتروا السبابة من كبار العذاريب 0000 وهرج البلايس ما يطول لحاكم

المذهب الطيب فهو مذهب الطيب 0000 والمذهب الخايب يبور نساكم

ياعيال ما سرحتكم باللواهيب 0000 ياعيال ما عمر المعزب ولاكم

ياعيال ماضربتكم بالمشاعيب 0000 ولا سمعوا الجيران لجة بكاكم

ياما توليت القبايل تقل ذيب 0000 من خوف لاينقص عليكم عشاكم

وياما شربت السمن من عرض ماجيب 0000 يـــفــز قــلبي يوم يبكي حداكم

أحفيت رجليني بحامي اللواهيب 0000 وخليت لحم الريم يخالط عشاكم

ياعيال دوكم لحتي كلها شيب 0000 هذا زمان قعودنا في ذراكم

قمت اتوكا فوق عوج المصاليب 0000 قصرت خطانا يوم طالت خطاكم

عطوني القرضة عليكم مطاليب 0000 عطوني القرضة جزى من جزاكم

لابد يوم عاوي دوني الذيب 0000 بالقبر ما افرق طيبكم من رداكم

ماني بفاضحكم بوسط الاجانيب 0000 باعمالكم يدرون كل اقرباكم

لوكان تدرون الردى والمعاييب 0000 صرتوا مع المخلوق مثل خوياكم

خوالكم بالطيب تروي المغاليب 0000 ولو تتبعون الجد محدن شناكم

وش علمكم يا تاركين المواجيب 0000 حسبي عليكم هالردى وين جاكم

قصيتكم واسندت وادي سلاحيب 0000 ولقيت بالصبخا مدافيق ماكم

ياعيال بعتوني (بصفر العراقيب)* 0000 ما هي حقيقة سود الله قراكم

يالله عسى اعماركم شمسها تغيب 0000 يعتم قمركم ثم تظلم سماكم

يا علكم في حاميات اللواهيب 0000 ياللي على الوالد خبيث لغاكم

شفت الجفا والحيف والغلب والريب 0000 بضلوعكم لابيض الله قراكم

عسى نساكم ما تحمل ولا تجيب 0000 ولا حدن من البزران يمشي وراكم

اخسوا خسيتوا يا كبار اللغابيب 0000 اهبوا هبيتوا يقطع الله نماكم

لاحول ولا قوة إلا بالله ...نعوذ بالله من عقوق الوالدين

سقراط · 04-02-2008

قصه و قصيده

مرشد البذالي:-

شاعر معروف وبارز توفي تقريبا قبل 35 سنه كانت له قصه واورد فيها قصيده طويله .

كان مرشد نازل في مدينه وهو كان بدوي ومتعلق بالبداوه ويدور الفرص علشان يطلع للبر ويتذكر حياة البداوه بماتحمله من صفاء النفوس وترابط ومعزه وكان كل ماطاح الربيع يطلع للبر ويتماشى ويسير على البدو ويسولف معهم فالباديه معدنهم اصيل ويرحبون بالطرقي ولايسالونه عن حاجته ويكرمونه .
المهم طلع مرشد في وقت ربيع وكان يلقط الزبيدي لحاله ولاحوله احد متشطر عن قطين بدو حوله يوم درى لاهاك البنت مع غنمها خجلت البنت واستحت وفي ذلك الوقت كان العفاف والاصاله قويه في قلوب الناس فلا يمكن ان حتى يفكر مجرد تفكير بمايمس الحياء نشدها مرشد من اي العرب هي وعن اهلها ويقول كانت من شدة حياءها مطمنه راسها وتفرقع اصبعه اذا ناظرت , درت ان مرشد طرقي ولاهو من اهل الديره وسالته عن حاجته قالها جاي اتمشى والقط زبيدي شافت البنت الزبيدي اللي مع مرشد قليل وعطته البنت بعض الزبيدي اللي معها وقالت حنا قريب من الديره واي وقت نبغى الزبيدي نحصله اما انت جاي من بعيد ومتكلف المهم اخذ مرشد الزبيدي سالها مرشد قال انتم مبطين هنيا قالت لنا حول خمس سنوات راحت البنت من عند مرشد وتعلق قلبه بها قعد مرشد في البر يومين ورجع للديره وقص قصته على واحد من اخوياه ووصف مرشد حياء البنت وعفتها وحسن منطقها وكلامها نقد علاه رفيقه وقال انت فاضي للعلوم هاذي لا تلقيها بال البنات واجد والعشق واجد تلقى غيرها ملايين .
رجع مرشد بعد حوالي ستة شهور لنفس محله ونوى يخطب البنت من اهلها واخذ كسوه وقهوه وغيرها وراح يم اهل هاك البنت يوم جاء لمحلهم اليا هم شادين ولا يدري مرشد وين ديارهم وزود على كذا انه بعد ماعرف اسم اهل البنت قعد مرشد والندم يقطعه ومر على مكان لقاءه بالبنت وتذكر جميع ماجرى بينهم من كلام ولم ينم تلك الليله واللي زاد في حزنه اصوات الذيب اللي تشعر بالوحده والغربه اصبحه الصبح وماطاب عينه نوم وتمثل بقصيده طويله منها هاذه الابيات :

البارحه جاوبت لي حس عاوي =ذيبا عوى جاوبت بالصوت واياه
ذيبا يجر الصوت كانه خلاوي =وياقلبي اللي جاوب الذيب بعواه
والصبح بانت في ضميري اهاوي=جريت صوتا ليت خلي توحاه
يادار ماشفتي ضبّي المطاوي =اتلا علامي به غشنك رعاياه
وانا على شوف الحبّيب شفاوي =كانه هنيا خبريني بمسساه
قالت لي الاوطان قلع ضحاوي =اليوم راس الرجم هذا توطاه
امسى هنيا واصبح اليوم ناوي =يتلي سلف بدوا بعيدا معشاه
كشف لهم برقا سديدا عشاوي =يخيلونه يم خشم المسناه
يبون مرباعا بهاك الحراوي =اليا زاف زملوقه وشبعت رعاياه
اخذ الخبر ماهوب خرص وهقاوي =اعطيك علم صويحبك وين تلقاه
ادنى مرابيعه بخشم الصداوي =وبيوت مقياضه بقريه مبناه
مير اطلب الله لو صوابك مخاوي =كم واحدا قبلك عشيره تمناه
يالعين ماينفع كثير الشكاوي =الا على اللي دبر الغيث وانشاه
ياونتي ونة وحيدا جلاوي =اللي سبب دينه من ادنى دناياه
ولا خلافه من يحل الدعاوي =لا صار ربعه منه تبا المثاراه
عليك ياللي لك بقلبي مكاوي =ثلاث كويات هوادي وعرقاه
عقبه فقدت من المنام الحلاوي =وحتى متاعي قامت النفس تجفاه
يا لايمي لعل مالك عراوي =بلاه ما ولعك بالحب حلياه
من لايعرف الحب عنده دعاوي =يشره على راع الموده ويشناه
ويقول هذا في مماشيه غاوي =وحنا ندل الدرب والحمدالله
يالله عسى مثله كثير الهزاوي =يبلا ببلوى من لسانه تهزاه
حتى يعرف ان المحبه بلاوي =ويشوف مثل اللي من الحب شفناه
عساه يبلا في محبة حياوي =حب الهنوف اللي يحده على اقصاه
تفرى ضميره فريّ دلو الرواوي =اليا صفقاها الجال من حد ملقاه
اليا لجلجته بالنظير السهاوي =كلامها لبيه عن قولتن هاه
كلامها للقلب مثل المداوي =اللي عرف علة مريضه وداواه
ياربي اني بالتفاتك رجاوي =تلم شمل الولف من عقب فرقاه
لوتنفع الفزعات والا النخاوي =على المحبه كان كلا نخيناه
مار الرجاء والياس صار متساوي =ياقلبي اصبر في تدابير الاله
لو مابقي في حالك الا شلاوي =مادبر الوالي على العبد يرضاه

قبل قليل وصلتني ابيات من هذه القصيده فبحثت عنها و وجدتها و قصتها و الرساله وصلتني من أخي في جده وقد انقضت فتره لم اراه فيها و فهمت انه يريد أن نتقابل بعنيزه غداً وإن شاء الله يحصل هذا ،،

سقراط · 04-02-2008

قصه و قصيده

نورة بنت حوشان بن علي الرشيدي، من قرية عين قنور الواقعة بين القصيم والدوادمي ،وقد توفيت في قريتها عام 1355 هجري :-
قصة قصيدتها الشهيرة :-

كانت نورة تعيش مع زوجها ، ووقع بينهما خلاف أدى إلى الطلاق ، ولم ترجع إليه ، وتقدم إليها الكثير الكثير حيث يطلبون الزواج منها ، لما عرفوه عنها من أخلاق نبيلة وصفات حميدة ، وقد رفضت الكثير منهم ، وفي يوم من الأيام مرت بطريق يمر على مزرعة زوجها ، وكان بصحبة نورة أولادها من زوجها عبود ، وعندما مرت بالمزرعة رأت زوجها ، فوقفت في أطراف المزرعة ، فذهب أولادها الصغار للسلام على أبيهم ، وهي تنتظرهم ، ولما إنتهوا من السلام على أبيهم ، أكملت مسيرها ، وقامت تتذكر تلك الأيام التي قضتها مع زوجها ، وقامت تتذكر من قام بخطبتها بعد طلاقها من زوجها ، وقالت القصيدة المعروفة ، والتي أصبح آخر بيت فيها مثلاً دارجاً ومعروفاً وأصبح الجميع يردده ، لما فيه من المعاني الكبيرة ، فهذا البيت عبارة عن معاني قوية ، قد يعجز البعض عن الإتيان بمثله...

أما القصيدة فهي :

يا عين هلي صافي الدمع هليه = وإليا انتهى صافيه هاتي سريبه
يا عين شوفي زرع خلك وراعيه = شوفي معاويده وشوفـي قليبـه
امنولٍ دايـم الـرايـه انماليـه = واليوم جيتهـم علينـا صعيبـه
وان مرني بالدرب ماقدر احاكيه = امصيبتٍ يا كبرها مـن مصيبـه
اللي يبينا عيّت النفـس تبغيـه = واللي نبي عيا البخت لا يجيبـه

سقراط · 04-02-2008

قصه و قصيده

ذهب الإبن دباس من (العودة من سدير ) في طلب الرزق إلى مسقط في عمان وغاب فترة طويلة ... قيل انها ثمان سنوات.
المهم ابو دباس ضعف حاله خلال هذه الفترة وأخذ يتوجد على ابنه .. وارسل له القصيدة المشهوره.
طبعا حيكت حول هذا الموضوع العديد من القصص ... الى درجة ان البعض أوصلها الى انتقام دباس ممن استضعفوا والده (وهم من جماعتهم) وسفك الدماء ... الخ.

ولكني في الحقيقة تحريت من احفاد هذه العائلة .. وافادوني بأن الموضوع لا يعدو حرص والد على عودة ابنه ...عبر التوجد بالأبيات التالية :-

ياونـة ونيتهـا مـن خـوا الـراس = مـن لاهـب بالكبـد مثـل السعيـره
ونين من رجله غدت تقـل مقـواس = ويون تالـي الليـل يشكـي الجبيـره
ويامـل قلـب مثـل بـن بمحمـاس = وياهشـم حالـي هشمهـا بالنقـيـره
ويا وجد حالي ياملا وجـد غـراس = يوم أثمرت وأشفا صفـا عنـه بيـره
من ثمر قلبي سـرى هجعـة النـاس = متنحـر درب عسـى فيـه خـيـره
الله يفكه مـن بـلا سـو الأتعـاس = ومـن شـر عبثـات الليالـي يجيـره
في ديرة تقطعـت عنـه الأرمـاس = سبعيـن يـوم للركـايـب مسـيـره
لا والله الا حال مـن دونـه اليـأس = حـط البحـر والبـر دون الجزيـره
يا الله يا اللي رد من عقـب مايـأس = يوسف على يعقوب وابصـر نظيـره
ترد علي دباس يا محصـي النـاس = يـا عالـم مـا بالخفـا والسـريـره
يا دباس بأوصيك صن درب الأدناس = تـرى الـذي مثلـك يناظـر مسيـره
عليك بالتقوى ترى العز يـا دبـاس = في طاعة اللـي مـا ينجيـك غيـره
هاذي ثمان سنين من رحت يا دبـاس = لا رسالـة جتنـي ولا مـن بريـره
يا دباس عقبك ترى البـال محتـاس = وعليك دمـع العيـن حـرق نظيـره
وعليك كني في دجا الليـل حـراس = أصبح علـى حيلـي وعينـي سهيـره
أصبح أنا ما بين طـاري وهوجـاس = وطـواري تطـري علينـا كثـيـره
مثل الوحش قلبي على كـف حبـاس = يكفـخ كمـا طيـر سبوقـه قصيـره
متحر من عليـة البيـت يـا دبـاس = أرجـي ثـواب الله وأخشـى المعيـره
أخاف من حكي العدا ثـم الأنجـاس = أهـل الحكايـا الطايلـه والقصـيـره
ويقال خـلا عيلتـه عنـز الـرأس = أقفـى وخـلا عيلـة لـه صغـيـره
والا فأنا يابـوك قطـاع الأرمـاس = ما نيـب مثبـور أو رجلـي كسيـره
آصلك لو دونك نبا حمر الأطعـاس = الصلـب والصمـان ماهـي عسيـره
مهالـك مـدارك مـا بهـا أونـاس = الا الثعـل والبـوم تسمـع صفـيـره
لأركب على وجنا من الهجن عرماس = فجا النحر يا دبـاس حمـرا ظهيـره
متروسة الفخذيـن مزيوعـة الـرأس = كن الخـلاص عيونهـا يـوم اديـره
أو شبـه ربـدا تخفـق لـلأونـاس = وان رفـعـت جنحانـهـا مسـذيـره
تنشر من العوده على نـور الأنفـاس = عنـد الفجـر والليـل مقفـي مريـره
والعصر با لصمان تسمع لها اضراس = حبل الرسـن خطـر تبتـر جريـره
نهـار ثالـث بيـن حمـا والأوراس = واره يمينـك جعلهـا لـك سفـيـره
ثـم علـى ساجيـة تقلـب الـرأس = تمشي بأهلها فـي البحـور الغزيـره
الى مسقط الفيحاء بها الخير محتـاس = لولا الكفر والشرك ياوي ديره
فيها الطبيخ وراهي الخبز يـا دبـاس = يقعـد خـوا الـرأس خنـة خمـيـره
هي ديرة اللي باغـي كيفـة الـرأس = ولا له أحد همـه مـن النـاس غيـره
هيس ولد هيـس للمواعيـن لحـاس = يفـرح ليـا نيـدي لذبـح النحـيـره
وما قفك ذا يا دباس ما فيه نومـاس = يصلـح لقيـن مهنتـه طـق زيـره
ترى الفـداوي دون وانشـد النـاس = راعيـة مـا يذكـر بمـدح او غيـره
ما له سوى طق الحنك منه واليـاس = وليا انقطع خرجـه فـلا لـه ذخيـره
طلب المعيشه بالحراثـه والأ جنـاس = المشتـرى والبيـع يوصـف وغيـره
قم انهض العيرات مـع كـل فـراس = يـا دبـاس دور خـيـر تستشـيـره
جدك وعمانك هـل العـزم والبـأس = أهـل المواجيـب مكمليـن القصيـره
يا دباس ما يصبر على البق والحاس = الا الـذي مـالـه بنـجـد عشـيـره
واليوم يا مروي شبـا كـل عبـاس = أنت الرجا يـا كعـام وجـه المغيـره
عشرين عام كلها ارجيك يـا دبـاس = مثـل الغريـر اللـي تولـع بطيـره
عدل المناكب هليـع فـرخ قرنـاس = يمناه فـي لطـم الحبـاري شطيـره
عانق خلوج روحت عقـب مـرواس = عنـد العصيـر لبيضهـا مستـذيـره
والليل جاها وحال من دونها اليـاس = روحهـا عـل فرقـاه فـرت فريـره
يا دباس أنا يا بوك ما نيـب بـلاس = ميـر ان عيـلات الرفاقـه كثـيـره
جنبت وسط السوق وامشي مع الساس = واخذ شـوي الحـق وأتـرك كثيـره
يا دباس لو جبت من دحب الأكيـاس = مختلفـة مــا بـيـن رز ونـيـره
ما لي بها يا جعلهـا بألـف قبـاس = او جعلها تذهـب ولـو هـي كثيـره
يا دباس قلبي كـل ماهـب نسنـاس = شرقيـة هـبـت بقلـبـي سعـيـره
والحال يافرز الوغى مسهـا البـاس = عليـك يـا ناطـح وجيـه المغيـره
وغصون قلبي يا فتى الجـود يبـاس = غـاد أنـا يابـوك كنـي هشـيـره
من شافنـي يقـول ذا فيـه لسـاس = واللـي بـرا حالـي الهـي خبـيـره
لا وعلا من قبـل غـوال الأنفـاس = ومفـارق الدنيـا يجيـنـا بشـيـره
عسى يطق الباب والنـاس غطـاس = يـا والـي القـدرة عليـك تعبـيـره
وصلاة ربي عـد ماهـب نسنـاس =على النبـي عـدة حقـوق المطيـره

سقراط · 04-02-2008

قصه و قصيده

وصلت القصيدة إلى الإبن دباس وهو في مسقط بواسطة مرسول . وقرأها دباس وندم على تركه لأبيه طوال هذه السنين ، وعلى ما اصاب والده خلالها من مصاعب من قبل جماعته.
كما قرأ في القصيدة تلميحات والده بأنه علم بأن ابنه دباس (طاح في التتن) ...(هههههه). وطبعا ارسل الرد على قصيدة والده بواسطة مرسول ايضا ... ووعد والده في القصيدة بأن يعود اليه قريبا وأن ينصره ويكون في عونه . كما ارسل له هدية عبارة عن سيف قاطع (وهذا معنى " مطرق إفرنجي مصاويبه الراس = ومصلبخ جبته عساني ذخيره "الذي وردت في رد الإبن)

المهم ... بقرائة قصيدة الأب والإبن دباس .. يستطيع القاريء أن يتعرف على القصة بشكل كامل ...
وفق الله الجميع .. واليكم رد الإبن دباس

حى الجواب اللى لفانا من الراس = .جابه اغلام ماتوانا مسيره
أهلاً هلابه عد ماصيغ قرطاس = أوماكتب فوقه من بيوت شطيره
جواب من هو لى مود من الناس = أبوي مايوصف حلى الغيره
فرز الوغى كنه على الوكر قرناس = أقروم ربعه كلها تستشيره
دليل عيرات إلى هب نسناس = ثم أدلهم الجو وما به ذخير ه
مهفى الغنم لهل الركايب والافراس = لاروحوا بيته عليهم قصيره
راعي معاميلٍ لها العبد جلاس = للبن يشرى بالسنين العسيره
هذي بمركاها وهذي بمحماس = وهذي يصبه للوجيه السفيره
واخلا فذا ياراكب فوق عرماس = مامونة من نقوة الهجن عيره
حمرا وهي في سنها وقم الاسداس = بالسن لافاطر ولا هي صغيره
ماهي لحوح راكبه بالعصاقاس = حرم عليها غير شيل النجيره
والخرج هو وبيوت هيل بقرطاس = مع مزهب الايام ماهي كثيره
وفوقه اغلام منيته قطع الارماس = لو هو بليلٍ مـاتغـير نظيره
واليا لقيت الدار فاجهز بالاحساس = وبلغ سلامي كل ذيك العشيره
واختص أبوي اللي نفل جملة الناس = وخصه بعلم وقل تراني بشيره
لايانجى العرض يابو دباس = إن كان تشكي الضيم فانا أسيره
ون سايلك عني تراني بنوماس = وانا احمد اللي ماتوسل بغيره
المدح لو يشرى شريناه باكياس = باموالنا نرخص ندور الستيره
مطرق إفرنجي مصاويبه الراس = ومصلبخ جبته عساني ذخيره
من صنع نصراني مشروبه الكاس = يذكر ورا جاوه بعيد مسيره
ربعٍ نوو فيك الردا والتخساس = مهبول يااللي قال غايب عشيره
على حق لودع الجمع بنحاس = لين العشير إيقوم يلعن عشيره
يابوي أنا مارحت ألكيفت الراس = مع ذا ولاني في سفاه وغيره
إن ماسكنا الدار من غير هو جاس = ولا نعاف الدار وندور غيره
كله العين كلمة قلت ياادباس = تشكي وانا دوني ابحور غزيره
خذلك يمين امشرع قطاع الانفاس = انه فلا جتني علوم بصيره
ان كان تشكي الضيق يابوي لاباس = جاك الفرج يابوي هو والبريره
ولافنا يابوي قطاع الارماس = اصبر على الشده ولو هي عسيره
يامسندي يابوي شوف اوكد الناس = ثم انشده قل ويش هو في مسيره
ان كان مايفرح صديقك ابنوماس = تحرم علينا اللى نهوده صغيره
مدلول مجهول زها زين الالباس = بنت الذي يثني الياجت كسيره
طارٍ يقول اظهر وطارٍ بجلاس = قمت اشرب التنباك وثره نكيره
ابغى عسى الله يبرد القلب ياناس = من لاهب شبت بقلبي سعيره
ومن كان غايب فلا يقطع الياس = ان قدر الله جاب علمه بشيره

منقول بتصرف

دكتورة نملة · 04-03-2008

قصه و قصيده

فكررة حلووة .........

ومجهوود طيب ... سقرااط

...

بحفظ الله

سقراط · 04-20-2008

قصه و قصيده

شاكر تواصلك يا دكتوره

البرنس · 04-28-2008

قصه و قصيده

0000 بارك الله سقراط 000

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قصيده في غلا الاسعار	ملكع	مجلس شعراء الخبر النبطي	4	02-20-2008 05:59 PM
قصيده في اسماء البنات	ملكع	مجلس شعراء الخبر النبطي	6	02-08-2008 07:11 PM
قصيده فرافيش	سامبامان	كورنيش الخبر للصرقعة والدردشة	2	06-30-2007 01:50 AM
قصيده مؤثره	أبو حمدان	مجلس شعراء الخبر النبطي	12	05-24-2007 10:17 AM
قصه و قصيده مؤثره	& سمو الذوق &	مجلس شعراء الخبر النبطي	0	03-27-2007 02:24 AM

المعلومات الواردة في هذا الموقع لا تعبر بالضرورة عن وجهة نظر الإدارة وإنما تعبر عن وجهة نظر كاتبها الإدارة لاتتحمل أدنى مسؤولية عما يكتبه الأعضاء أوعن أي علاقات قد تنشأ من خلال الموقع
روابط ذات صله	روابط ذات صله	روابط ذات صله	روابط ذات صله
سيارات الخبر مدينة الخبر العاب الخبر طب الخبر	مهرجان الخبر منتدى طلاب وطالبات الخبر منتدى برامج الخبر Institute For Languages تصميم الخبر	الخبر للاهداءات والترحيب عيادة الخبر واحة الخبر للثقافة والأدب صوتيات و مرئيات الخبر	افلام الخبر توبيكات \| توبك شرح برنامج الخبر برنامج الخبر كرة القدم الخبر

الذين يشاهدون محتوى الموضوع الآن : 1 ( الأعضاء 0 والزوار 1)

التسجيل مجاني
سجلاتنا تفيد بأنك غير مسجّل ,, يرجى التسجيل إسم العضو كلمة السر تأكيد كلمة السر البريد الإلكتروني تأكيد البريد الإلكتروني هل انت موافق؟ قوانين المنتدى